MOBILITY LABEK FINANTZATUTAKO UPV-EHUren BI PROIEKTUK BI SARI ETA OHOREZKO AIPAMENA JASO DITUZTE GRADU ETA MASTER AMAIERAKO LANETAN
Saritutako lanen gaiak dira metatutako datuetan oinarrituta erabakiak hobeto hartzea eta sare elektrikoan edozein aldaketa identifikatzeko aukera
‘Business-Map: Visualización y herramienta de consulta interactiva de servicios comerciales de la ciudad de Vitoria-Gasteiz/Gasteizko hirian merkataritza-zerbitzuen kontsulta interaktiborako bisualizazioa eta kontsulta-tresna’ eta ‘Identificación Paramétrica de Sistemas Eléctricos con gran Penetración de Convertidores de Potencia/Potentzia Bihurgailuen Penetrazio handiko Sistema Elektrikoen Identifikazio Parametrikoa’ proiektuak dira sarituak, Zaira Gilen eta Oier López de Susoren Gradu Amaierako eta Master Amaierako Lanak, Mobility Lab Fundazioak finantzatuak UPV-EHUrekin egindako akordioaren barnean.
Zaira Gilek Industria Antolakuntzaren Ingeniaritzako Graduko UPV/EHUko ikasleen VII. Kongresuko GRAL Onenaren lehen saria lortu du, Gasteizen erabaki estrategikoak hobeto hartzeko tresna interaktibo bat sortzeko egin duen lanagatik. “Datuak modu interaktiboan bistaratzeko tresna bat izateak erabakiak hartzeko modua eralda dezake, bai sektore pribatuan, bai publikoan. Proiektuaren lehen atalean, ekintzaileek auzo bakoitza ebalua dezakete hainbat faktoreren arabera, hala nola lehia, ezaugarri demografikoak, katastro-balioa eta hazkunde-joerak. Horri esker, ondo oinarritutako kokapen-estrategia defini dezakete. Bigarren atala Administrazio Publikoari zuzendua dago, eta auzoak aztertzeko eta konparatzeko gaitasuna ematen die, migrazioa, biztanleriaren banaketa eta errenta bezalako adierazleen bidez. Horrela errazago identifikatuko dute zein eremuk behar duen arreta handiagoa. Proiektua gailu mugikorretarako egokitzea proposamen berritzailea izan zen, irisgarritasuna handituz “, adierazi du Zaira Gilek.
Zaira Gilen proiektuak, gainera, Eusko Jaurlaritzako Administrazio Digitalaren eta Zerbitzu Orokorren Sailaren hirugarren saria jaso du, “Euskadiko datu irekien berrerabilpen onenei” ematen zaiena.
Bestalde, Oier Lopez de Susok bere Master Amaierako Lanagatik ohorezko aipamena jaso zuen Arabako Industria Ingeniarien Elkargo Ofizialak antolatutako sarietan, “Identificación Paramétrica de Sistemas Eléctricos con Gran Penetración de Convertidores de Potencia/Potentzia Bihurgailuen Penetrazio handiko Sistema Elektrikoen Identifikazio Parametrikoa” izeneko lanagatik. Lan hori 50th Annual Conference of the Industrial Electronics Society konferentzia ospetsuan ere aurkeztu zuen, Chicagon. Bere lanean Oierrek aurkeztu duen metodoak potentzia-bihurgailuei aukera emango die konektatzen diren sare elektrikoan edozein aldaketa identifikatzeko, haren jarduketa egokitu ahal izateko. Teknologia hori funtsezkoa izan daiteke energia-aplikazioetan, ezinbestekoak energia-iturri jasangarrietan oinarritutako mugikortasuna lortzeko.
Vitoria-Gasteiz Araba Mobility LAB Fundazioak Euskal Herriko Unibertsitatearekin 2023an sinatu zuen hitzarmenaren erakusgarri dira saritutako proiektu horiek. Hitzarmen horren bidez, Mobility Lab-campus (lurralde berdea eta jasangarria) jarri zen martxan, mugikortasunaren eta logistikaren alorrean prestakuntzarako, ikerketarako, berrikuntzarako eta ezagutzaren transferentziarako aliantza estrategikoa. Hitzarmen horrek aukera ematen du Gradu Amaierako Lanak, Master Amaierako Lanak eta doktore-tesi industrialak egiteko, bai eta doktoratu aurreko ikertzaileak kontratatzeko eta ekipamendu zientifiko berria eskuratzeko ere.
