Malagan, 2026ko martxoaren 11n. Mobility Lab Vitoria-Gasteizek “Junta de Andalucía Award for the Best Innovative Project for the Future of Mobility” saria jaso du eMobility Innovation Awards sarien barruan, eMobility Expo World Congress 2026 ekitaldiaren esparruan, Malagan.

Nazioarteko aitortza honek mugikortasunaren etorkizuna eraldatzeko eta garraio-sistema jasangarriago, seguruago eta eraginkorragoetara trantsizioa bizkortzeko gai diren ekimenak saritzen ditu.

Epaimahaiak Mobility Lab Vitoria-Gasteizek garatutako proiektua nabarmendu du, hiri Sandbox batean eta mugikortasun eta logistika jasangarrirako datu-espazio federatu batean oinarritua. Ingurune honek hiriaren barruan, baldintza errealetan, irtenbide berritzaileak esperimentatu, balioztatu eta eskalatzeko aukera ematen du.

Sari-banaketaren ekitaldia Malagako Gran Hotel Miramar ospetsuan egin zen, eta han bildu ziren hainbat herrialdetako administrazio publikoetako, enpresa teknologikoetako eta mugikortasun-sektoreko liderretako ordezkariak. Saria Iñigo Bilbao Vitoria-Gasteiz Araba Mobility Lab Fundazioko zuzendariak jaso zuen, ekimen hau bultzatzen duen ekosistemaren ordezkari gisa.

Mugikortasun urbanoa eraldatzeko berrikuntza aplikatua

Mobility Lab Vitoria-Gasteizek bultzatutako ereduaren helburua da hiria mugikortasuneko laborategi bizia bihurtzea, non enpresek, zentro teknologikoek, administrazio publikoek eta startupek garraio adimendunarekin, hiri-logistikarekin edo mugikortasun-datuekin lotutako teknologia eta zerbitzu berriak proba ditzaketen.

Hiri-esperimentazioa, datuen gobernantza eta lankidetza publiko-pribatua uztartzen ditu proiektuak, emisioak murrizten, eraginkortasun logistikoa hobetzen eta hiri jasangarriagoetarantz aurrera egiten lagunduko duten irtenbideak bultzatzeko.

Iñaki Gurtubai, berdintasun, euskara eta gobernantzako foru diputatuaren hitzetan, “aitortza honek Mobility Labek ia hiru urteko ibilbidean egindako lana babesten du, Arabako ekonomiaren bi sektore estrategikotan berrikuntza sustatzeko: mugikortasunean eta logistikan. Esperimentaziorako guneak sortzea eta horiek datuen kudeaketarekin lotzea funtsezkoa dela erakusten du arlo horietan berrikuntza sustatzeko”.

Ikuspegi honek Gasteiz Europako erreferentziazko ekosistemetako bat bezala kokatzen du mugikortasunaren berrikuntzarako, proiektu pilotuen sorrera sustatuz eta sektorean talentua zein inbertsioa erakarriz.

Sektoreko Europako ekitaldi nagusietako baten Saria 

Saria eMobility Innovation Awards sarien galan eman zen, eMobility Expo World Congress 2026ren barruan, mugikortasun jasangarriari, elektrifikatuari, autonomoari eta konektatuari buruzko Europako topaketa nagusienetako batean.

Urtero, sari hauek mugikortasunaren etorkizun eraginkorrago, jasangarriago eta pertsonengan zentratua eraikitzeko irtenbide berritzaileak garatzen ari diren enpresak, erakundeak eta proiektuak saritzen dituzte.

Sari honekin, Mobility Lab Vitoria-Gasteizek nazioarteko posizionamendua indartzen du, hiri-mugikortasunerako eta logistika jasangarrirako irtenbide berriak garatu eta balioztatzeko berrikuntza aplikatuko plataforma gisa.